السلام عليكم ورحمة الله وبركاته
أخباركم يا حلوات ؟
يا حلو المواضيع المشتركة ،، خصوصاً إذا كانت مع مبدعات تتشرف الوحدة أنها تسوي معهم موضوع موضوعنا الجماعي هنا
في البداية شكراً لنينتي الجميلة وشكراً لحبيباتي اللي تشرفت اني انضم لهم و شكراً جزيلاً لصاحبة الفكرة مبدعتنا و المنسقة اللي تعبت معنا الفاكهة المحرمة
شكراً للي اختارت ان المكون يكون المشمش << كل كلامي صار شكر d:
بس جد ماتوقعت أني يوم من الأيام بسوي و صفه عن المشمش ، و لما قالوا لي ماحبيت المكون لكن كنت ابي اشارك في الموضوع و بس
جلست ادور على وصفه و جهزت وصفتي و رحت الاربعاء الماضي اجيب المكونات و انصدمت اني مالقيت مشمش طازج و لظروف ما – حسيت اني طولت القصه – ما قدرت اجيبه بس جبت مشمش مجفف و مربى و الوصفات اللي كنت مختارتهم تبغى مشمش طازج ، و قبل ما أنام جت ببالي هالفكره ” قبل النوم تطلع الابداعات d: ” هي كفكره مو فكرتي لكني حرفت فيها و خليتها تناسبني و تناسب المشمش
“سوفليه تشيز كيك المشمش “
وصفتي سهله و لذيذه و سريعه
بس شوي غريبه صح !! هو نقدر نقول السوفليه لأننا بنستخدم صحون السوفليه
لما سويته شاورت نينا قبل لأني كنت متردده كثير أن طعمه يطلع حلو الفكره عاجبتني بس الطعم مو متأكده و أول ما برد التشيز ذقت لي ملعقة و ماقدرت أقاوم خذت 3 معها
أبداً ما توقعته يطلع بهاللذه أعجبني حبيت طعمه الخفيف
المقادير :
بسكوت دايجستف + زبدة
مربى مشمش
علبة قشطة – 400 جرام جبن كريمي “علبتين فيلادلفيا ” – ملعقتين دقيق – ملعقة صغيرة فانيلا سائلة – صفار أربع بيضات – بياض اربع بيضات – ثلاث ارباع كوب سكر
الطريقة :
– نطحن البسكوت و نذوب الزبده و نخلطهم سوا و نضيفهم بصحون السوفليه و دخليهم الفرن 10 دقايق يتحمص البسكوت شوي ، و عشان تسهلين على نفسك جيبي كاس قد صحن السوفليه و اضيفي مقدار من البسكوت و اضغطي بالكاس : )
– اضيفي مربى المشمش ” حسب الذوق ، أنا صحوني صغيره أضفت نص ملعقه “
– اخلطي بياض البيض لحد ما ينتفش و يكون المنقار
ملاحظه : بياض البيض يحتاج وعاء معدني عشان ينتفش ، هالشي له دخل بالخواص الفيزيائيه لجزيئات بياض البيض و قوى التماسك و التلاصق << ألا تدوخكم معها هي و دراستها 
– في وعاء ثاني اخلطي بقية المقادير
– اضيفي كمية من بياض البيض و اخلطي بالسباتولا من فوق لتحت يعني ترفعين الخليط اللي تحت لفوق لحد ما يندمج بياض البيض و اضيفيه كميه ثانيه لحد ما تخلصين بياض البيض كله
– نضيف خليط التشيز في صحون السوفليه فوق المربى
– نجيب صينيه لها ارتفاع و نصف صحون السوفليه و نصب في الصينيه كمية من الماء المغلي << كمية بسيطة يعني توصل لربع ارتفاع صحن السوفليه
– ندخله الفرن 170 درجة مئويه الرف الاوسط من فوق و تحت و نخليه بالفرن من نص ساعه لساعه إلا ربع
– اذا نضج “يتشقق السطح شوي و يصير لما تضغطينه باصبعك يرتفع “ضغطه خفيفه مو تفغصينه و تقولين ما ارتفع D: ” نفتح باب الفرن بزاوية 30 << يمديكم على دقة طالبات العلمي :p ، مو شرط 30 بس المقصود أنها تكون فتحة بسيطة بحيث يدخل هواء المطبخ البارد للفرن لما يبرد الفرن طلعي التشيز كيك و دخليه الثلاجه
فائدة هالخطوة عشان ما يهبط التشيز كيك
و بسس دخليه الثلاجه لوقت التقديم ، أنا زينته بسكر بودره و شرائح من المشمش المجفف
الصور النهائية :
بسم الله
شوفو طبقة التشيز وتحتها المربى 
كل وحده تذوق لا تستحي : )
يارب تكون الوصفة أعجبتكم ، للي حابة تشوف مجلتنا هنا
– كاسين ماء ..
