والله احترت كثير انزلها ولا لا .. بس بالأخير قلت بحطهآ فرصه أسولف معكم شوي وابارك لكم بالشهر الفضيل ..

المكونات :
كيكة بيتي كروركر [ وماتحتاجه من ملحقات ]
كريمة [ استخدمت البتر كريم الأمريكي وبحط طريقته تحت ]
عجينة الفوندان [ مايقارب 700 جرام ]
حشوه للكيكه [ سواء مربى أو كريمه انآ أستخدمت المربى ] 

أنآ استخدمت فوندان جاهز من ملتقى الخبازين أتوقع الـ 500 جم بعشرين ريال ما أذكر بالظبط ..
وعموماً ملتقى الخبازين في الرياض
في شارع الضباب جنب مطعم ماما نوره ،، والفرع الثاني نهاية شارع المدينه المنوره جنب منؤشه

في جدة لهم فرعين فرع حي الشرفية بجنب مستوصف بدر الدين الفرع الثاني بشارع قريش قبل حلويات نعمة واسمه بيكمـيت

في الشرقية شارع سعود وقبل مبني الجفالي بيجي مسجد ابيض على اليمين هو قبله بالضبط وترى المحل مره صغير ومو مبين حيل ومكتوب عليه بيكمنت (احمد عبدالوهاب)

هذا الفوندان اللي شريته من ملتقى الخبازين ..

أول شي جهزت كيكة بيتي كروكر ..

بعدين علمت على طرف الكيكه عشان اعرف وين احط الطبقه الثانيه بعد ما افكهم عن بعض ..

قسمت الكيكه بالعرض لقسمين ،، وحشيتها بالمربى وحطيت على أطراف الكيكه شوي كريمه عشان لا يختلط المربى بالفروسنغ الخارجي ..

دهنت كامل الكيكه بالفروسنغ ..

وطريقته :

نخفق اصبع زبده [ 100 جم ] مع ملعقه صغيره فانيلا سائله [ ماكان عندي فانيلا سائله ]

إذا صارت الزبده مثل الكريمه نضيف لها نصف كمية السكر وكلعقتين حليب ساده أو كريمة خفق [ أنآ أضفت ثلث كوب ] 
ونخفق بعدين نضيف باقي كمية السكر ونخفق ..
وكذا جهزتي بتر كريم أمريكي ..

بعد كذا لهيت مع الشغل ..  لأنو جد متعب ومافي احد معي ويدي وصخه فما قدرت أصور لكم ..
عموماً لونت الفوندان [ أحمر + أزرق + أصفر ] عشان يعطيني اللون البني وليتني ماسويت هالمكس بس كنت مجبوره .. 
بعد كذا فردت الفوندان [ طبعاً تدهنين السطح بسمن وتدهنين المفرده ( النشابه ) عشان لايلصق الفوندان ]
و اضفته على الكيكه << تقطع =”(

بعد كذا لونت جزء منها بالأصفر .. 

لونت البتر كريم بالأصفر وكتبت وأنآ في حاله من الغضب فتشوفون خطي كبيير وماكفى الكيكه قمت نزلت تحت ،، سهالات الدنيا سهالات .. 

كيكتي الموقره مستحيه كانت بتهون تطل عليكم 

طبعاً هذي تجربتي الأولى لكيكة فوندان ..
كانت متعبه لكن ممتعه .. صحيح مو بالمستوى المطلوب لكن حققت الغرض وكتجربه أولى تعتبر جيده << تقيم نفسها