وصفاتي اللذيذه : )

6 وصفات لذيذه =)

اليوم بنزل جزء من وصفاتي اللذيذه ، أتمنى تطبقونها وتعجبكم ..

التشيز كيك البارد [ بدون فرن ]

الطريقه خذتها من الجميله Aream من منتديات شمواه و كانت سيهله وجداً لذيذه ..

سويتها بكاسات أرتب ..

المكونات :

للقاعده : [ كوب ونص بسكوت دايجستف مطحون – نص اصبع زبده مذوب ]

علبة حليب محلى مركز

علبة جبنة فيلادلفيا 200 جرام

كاس كريمة خفق ،250  جرام

ملعقة ونصف جيلاتين بودره [ استغنيت عنها لأني سويته بكاسات لو صينيه اضفته عشان يعطي تماسك ]

الطريقه :

تفرك البسكوت بالزبده ونضيفه كطبقه أولى ، وندخله الثلاجه على بال ما نجهز خليط التشيز ..

نخلط الحليب المركز مع الجبن

نخفق الكريمه مع الدريم ويب

نضيف خليط الحليب والجبن لخليط الدريم ويب ونخفق ..

في حال بنضيف جيلاتين نذوبه في ثلث كاس ماء ساخن لين يذوب وتختفي الكتلونضيفه ونخفق ..

نصب الخليط في الكاسات بالتساوي ..

ندخلها في الثلاجه حتى تبرد تماماً ..

نضع على الوجه باي فيلينق أو أي صوص نفضله .. وبالعافيه .. ♥

– – – – – – – – – – – – – – – – – – – – – – – – – – – – – – – — – – – – – – – – – – – – – – – – – – – – – – – –

.. صينية بيتزآ التوست ..

هالصينيه بعد لذيذه ممدري شلون أوصفها لكم
[ كل شي عندها لذيذ ،، لآ جد لو مو لذيذه مانزلتها لكم ]
هي نآآعمه على الفم ولذيذه وخفيفه وتفتح النفس وريحتهآ تشهي
تنفع عشا خفيف ..

المكونات :

– خبز توست
– زيتون
– فلفل اخضر
– مرتديلا
– بصل اخضر
– جبن موزاريلا
– جبن رومي وتشدر
– مشروم

للصوص :

– علبة قشطة
– ملعقتين جبن سائل
– ثلث كوب ماء

صوص البيتزا:

بصل مقطع نشوحه على النار بزيت زيتون مع ثوم مفروم ثم نضيف له طماطم مفرومة ونقلبهم مع شوي كتشب واوريجانو وبابريكا وثوم بودر ونتركها تتسبك

الطريقة:

نفرد شرايح التوست في الصينية و نفرد صلصة البيتزا عليها
[ أنآ هنا استخدمت صلصة بيتزا جاهزه حسيتها اطعم و حتى خلت ريحة الصينيه بعد ما طلعت تشبه بيتزا هت ]

نجهز الفلفل البارد وزيتون و المرتديلا و البصل اخضر والمشروم ..

نضيف الزيتون والمشروم والفلفل البارد والمرتديلا
نضيف جبن الموزاريلا والتشيدر وتوصو بالجبن هو اللي يخليها ألذ وتصير تقطر
[ ماكان عندي تشيدر كرافت أضفت جبن تشيدر الشرائح ]

نصف الطبقه الثانيه من التوست ونخلط الصوص بالخلاط ونصبه على التوست ونرش ششوي جبن موزاريلا ..
ندخلها الفرن من تحت شوي لما يمسك التوست شوي [ مو أقل من ربع ساعه ] وبعدين من فوق لما تتحمر ..

وبالعافيه ..

مراوح السينمون ..

الحلوه Miss.nenaنزلت موضوع بشمواه إهداء لي و أكيد طبقته و أنا مغمضه ..

رآبط موضوعها الجميل ..

سويتها بعجينة أمي ..

الفكره حلوه ومميزه وأحلا في التقديم من السينبون العادي .. شكراً نينتي ..

وبنفس العجينه سويت أطول سينبون في العالم :p

قبل ما اضيف الصوص ..

تحسوني كثرت الصوص بس اهلي مهووسين بالصوص مع السينمون وأنا كذلك ..

سويت برضو وردات الجبنه بس مسكينه خليتها وقت طووويل لين ماتخمرت و ضاعت معالمها

– – – – – – – – – – – – – – – – – – – – – – – – – – – – – – – — – – – – – – – – – – – – – – – – – – – – – – – –

جريش بالحليب ..


طريقته نزلتها في شمواه هنا ..

أنا مو من عشاقالجريش بس عادي لما يكون بالحليب وتوه مطبوخ آكله وأحبه .. 

الطريقه كتبتها بالتفصيل ..

– – – – – – – – – – – – – – – – – – – – – – – – – – – – – – – — – – – – – – – – – – – – – – – – – – – – – – – –

.. صينية الدجاج بالبطاطس ..

هذي أكثر صينيه أحبها في الحياه ..
لذيذه بششكل أخواني دايم ينهبلون عليها صغيرهم وكبيرهم
صح الصحن مو مرتب لكن ماكنت ناويه أصور .. على أساس مصورته من قبل ومسويته بصيتيه فخاريه بس راحت الصور واشوا اني صورت ..
تخيلو طعم الجبن والقشطه مع الدجاج والبطاطس و بتعرفون قصدي
أحلآ شي فيها تجيك كل حبة بطاطس و دجاج ملبسه بالصوص لأن الصوص جلس يتفاهم معهم زيين في الفرن ..

نبدآ بسسم الله ومع المكونات :
– صدور دجاج مقطعه مكعبات ..
– بصل
– ثوم
– طماطم
– شوي زيت للقلي والتحمير
– جبن تشيدر + جبن موزاريلا ..
– بطاطس مقطع مكعبات أو شرائح عريضه شوي مو نحيفه و مقلي ..
– بهارات [ مكعب ماجي بابريكا اوريجانو بقدونس جاف فلفل أسود ]
– ممكن زيتون أسود مقطع و مشروم إذا حابين أنا هالمره ما أضفتهم ..
برضو ما أضفت الطماط لأن كان فيه دجاج محموس مع بصل وبهارات وثوم فاستخدمته و ماكان فيه طماط ..
وعموماً في مثل هالاكلات تقريباً كل شي اختياري !!
على حسب ذوقك سواء الكميات أو المكونات ممكن تزيدين أو تنقصين زي ما انتي حابه كله يرجع لمسألة الذوق !!

وللصوص :
– 3 ملاعق جبن سائل
– 3 ملاعق قشطه
– ملعقتين مايونيز

نجهز الدجاج :

1 / قطعي البصل مكعبات صغيييييره واحمسيه في زيت الزيتون مع الثوم لين يشقر لون البصل ..

2 / اضيفي صدور الدجاج وقلبي ..

3 / لما تنشف موية الدجاج أضيفي البهارات .. وبعدين المشروم والزيتون الأسود

هاتي صينية فرن و أول شي نحط الدجاج بعده البطاطس المقلي نرش جبن التشيدر المبشور بعدين نكون مجهزين الصوص وخالطينه ..
نضيف الصوص على الدجاج وآخر شي نرش جبن موزاريلا ..

دخليها بالفرن من تحت تقريباً ربع ساعه بعدين ولعي الفرن من فوق وخليها تتحمر ..
[ كنت مصوره الخطوات على اساس اكمل ويكون النتيجه هذيك الصوره اللي راحت ]

– – – – – – – – – – – – – – – – – – – – – – – – – – – – – – – — – – – – – – – – – – – – – – – – – – – – – – – –

كيكة الجزر المالحه


من فوق ..

من قلب الصينيه ..

خذتها من طبطب الجميله .. مره لذيذه ومافيها طعم الجزر .. تصلح عشا خفيف ، أو مع الشاهي ..

كنت موديتها لخالتي ونالت استحسان الجميع .. الفرق بين كيكتي وكيكة طبطب أني سويتها كب كيك وهي كيكه ..

وأنا زينتها بالجبن السايل وهي بالطماطم .. م

طريقتها هنا ..

وبسس أن شاء الله تكون أطباقي نالت على استحسانكم وتطبقونها وتوروني ..

بحفظ الله ..

28 thoughts on “وصفاتي اللذيذه : )

  1. ااااه يا شين الكومنت لما يروح كتبت لك كلام كثييييير .. لكن اهمه ان شكل اهلك ينبسطون زيي لما يجي رمضان و انواع الإبداع ^^ الصينيه حلوه ذكرتني بصينيه احب اسويها المشروم و الجبن و الدجاج @.@ يعافيك علا الوصفات. و الشرح و ان شالله بأقرب فرصه جاري التطبيق ^^ 

  2. Beno
    أهلاً أهلاً ببينو نورتي المدونه يا حلوه ..
    جد شعور مو حلو جربته من قبل -_-
    ههههههه ايه والله صادقه :p
    صينية الدجاج شي قاتل *-*
    بنتظر تطبيقك ومتأكده بيكون جميل .. ♥

  3. لالآ مستحيل سارلي زي بينو
    كنت اقول تخيلي يسرلي زي بينو <<<< وسار T_T
    ………..
    امممم اطباقك تشهي <<< جاعت البنت .. ♥
    اي شي في جبنه وقشطه اموت عليه
    (ياليت كان بين الاطباق فوتشيني<< اعشقه ).. ♥
    ان شاء الله اجرب صينية الدجاج والبطاطس^^
    ومشكوره على الاطباق اللذيذه الا من يدك الحلوه..

  4. Rawwan

    ههههههههههههههه أحلى شي أنك عدتيه :$ ، شكراً لك : )

    شكراً :$
    الجبنه و القشطه إذا اجتمعوا اجرموا في الناس ♥_♥
    أفا عليك نزلت طريقة الفوتشيني من قبل شوفي في ارشيف مطبخي الصغير .. ♥
    و أنتظر تطبيقك بس أعزميني عليها :p
    العفو ، أنتِ الأحلى :$

  5. يمييييييييييييييييييييييييييييييييييييييييييييييي لذيذ جدااااااااااااااااااا و تقتح النفس خاصة انها العشر من ذي الحجة فكلنا صايمين ههههههه و جيعانين
    القشطة و الجبنة اعشققققققها جدااااااا و هنا اجتمعوا فإيش أسوي …..
    ما أقدر امسك نفسي شهيتوني
    شكرا لك يا منور على كل جديد و أثابك الله في عملك
    ادعيلي أرجع من الحج بسلام يا صديقتي
    و شكراااا
    يا قمر

  6. فتاة الاشراق
    العفو ، نورتي يافتاة =)
    يارب ترجعين بالسلامه ، و ترجعين نقيه من الذنوب والخطايا ..
    ولا تنسين من دعائك ..
    أستمتع بتعذيب الناس :p
    بس لأنه في الأخير التعذيب يطلع الإبداع .. :p

  7. آآآآآآآآآه كم هذه التدوينة معذبة بششدة ! تهئ تهئ
    لولآ البوب كورن والدآيت كوك والا كآن الوضع مختلف !

    كل الأكلات علقت عليها بشموآه :كيوت:
    بس برجع ثانيه آعلق وآقولك كل شيء من آيدك يجنن !
    آكثر شيء عذبني الآن هو صينية التوست :”(
    يادووبآ صورتها والجبنة سآيحه كآنت آجرآآآم
    زيني لي وحدة يالله آشوف p:
    تسلم ديّاتك يآ آحلى شيفه :*

    آتوقع هالتدوينة ماعاد تقربينها من بعد البريسز :بليز:
    الله يكون بعونك يارب ♥

  8. Munirah Ibrahim

    سلامتك من العذاب كله ..
    بس يقولون التعذيب يدفع العجازين للطبخ ارضاء لغرائزهم :p
    مع انك ترا مو عجازه أبداً من البنات النشيطات و السباقات في التطبيقات :$

    و صح كلها نالت شرف مدحك وتعليقك :$
    ههههههههه والله من عيوني بس أنتِ تعالي :ح
    ربي يسلمك يا أحلى [ أمرره ] << يعني مؤنث قمر :d

    آمdk K كلها اقدر عليها بالتنتيف :p
    ماعدا صينية الدجاج هذي ماتتنتف :بليز:

  9. منوووووووووووووري ابي تشيز كييييييييييييييييك
    شكللللللللله لذييييييييييييييييييييد وخطيير من جد
    مشاااء الله كل وصفاااااتتتتتتتتك خطيره ومميزة
    واهم شي اناا تفتح النفففس وتشههههي
    ومستحيييل انسسى السينبوون الي جبتيييه المدرسسه
    كاان شي حمااااااااسي ولذيييييد
    <<آبييييه 🙁
    تسللللللللم يديااتتك الجمييييييييييله
    الله يحفظظك
    بحفظ الرحمــــن :*:*

    • أنتي تعالي و أصير لك تشيز كيك :”(
      من ذوقك يا قمر :$ ♥
      السينبون انتي ومنور ، هو صح اعترف انه كان لذيذ :p
      بس مو لهالدرجه يمكن لأنه من يديني زان في عيونكم ولا لو قلت ان احد ثاني مسويه ما راح يعجبكم :p
      < محد مدح نفس زياده عن اللزوم :p
      ربي يسلمك .. آمين و إياك ..
      الله معك ♥♥

  10. ما شاء الله عليج روووووووووعة شغلج ربي يحفظج
    الأكلات لذيذة ما شاء الله ^____^
    حبيت أكثر شي (صينية البيتزا بالتوست) أحسها خفيفة و لذيذة
    سلمت إيدج الطيبة غاليتي . . و بانتظار المزيد ز المزيد

    🙂

  11. يًمممي !!

    شكلها مررره مشهي حرام عليك طيحتي سعابيلي :'(

    ماشاءالله عليك تبارك الله ^_^

  12. برأيي أن تبدلي العنوان إلى : وصفات تعذيب ”
    < الكسلانات يتعذبوا هنا XD

    شيف مبدعة كما عوّدتنا يا منيرة :")
    ما شاء الله ، تبارك الله
    سلمَت يداكِ ولا عدمنا هذا الجمال <3

    • || نبض النقاء •.

      ههههههههههه أنا أبغى أعذب الكسلانات عشان يتحمسون :p

      تسلمين يا نبوضتي :$ ، ربي يسلمك

      ولا عدمت هذه الطله

  13. رووووووووووووووووووووووووعه الوصفات جد جد شيء يشهي شكرا

  14. ااااااااااااااااااااااااااااااااااااااااااااااااااااااااااااااااالله قسمن شي خطيييرر
    ماشاءالله عليكي
    اعزميني عندك 🙁 ابي اذوق طبخك
    بطبق بيتزا التوست .. يارب تطلع كويسه
    متاكده ماراح تطلع شهيه مثل حقتك 🙁
    بسم الله عليك وربي يحفظك

  15. رااااااااااااااااااااااائعه جدا ولاكن اريد انا ارى كل انواع طبخك هنا هل هناك طريقه للتسجيل

    من جد كلك ذوق ووصفك دقيق ومنسقه في عرضك وفي اسلوبك وطريقة شرحك قد ما امدح ما اوفيك حقك

    • هنو

      شكراً على اطرائك يا جميلتي :$
      لا حرمت جمال روحك ♥♥

      ستجدين كل الوصفات التي وضعتها في المدونة / هنا

  16. السلام عليكم و رحمة الله.
    ما شاء الله لا قوة إلا بالله .. الله يحفظك يا منور و يبارك فيك و يزيدك من فضله .. واصلي عطاؤك الأمة بحاجة .. لكن يا غالية تجنبي صور الأرواح و نصيحة لك أختي الغالية .. لا تسجلي في منتديات فيها مخالفات كثيرة مثل شامواه لأنه فيها صور نساء و هو منتدى مختلط لكن حبذا توجهي لهم نصيحة و ما يكون هناك مشاركات أبدا. و نصيحة لك أخيرة يا غالية يا ليت يكون لك موقع بدل المدونة لأنه أحيانا تطلع إعلان المدونات أخرى تحوي مخالفات شرعية.
    و جزاك ربي خير و واصلي عطاؤك ربي يسعدك.

اترك رد